Sandy irla Australia eta Kaledonia Berriaren arteko erdibidean dago mapen arabera. 26 kilometro luze, publikazio zientifikoetan aipatua izan da eta Google-en Maps eta Earth puntako mapa-sistemetan ere agertzen da. Ikerlari-espedizio bat bertatik igaro zenean, ordea, ez zuten itsaso urdin eta zabala besterik topatu.

Ikerketako partaide den Maria Seton-ek (Sydneyko Unibertsitatea, Australia) adierazi bezala, bazuten susmoa sorpresaren bat aurkitzekoa mapek Sandy irlari esleitzen zioten kokalekuan. “Gure nabigazio-mapek adierazten ziguten irlaren kokalekutik gertu itsasoak 1400 m-ko sakonera zuela. Arraro samarra iruditu zitzaigun irlatik hain gertu itsasoak halako sakonera handia izatea”. Bertaratzean, euren mapek adierazten zuten 1400 m sakon den itsasoa besterik ez zuten aurkitu ikerlariek, Sandy irlaren arrastorik ez.

Australiako Hidrografia Zerbitzuko bozeramalearen iritziz, Sandy irlaren existentzia giza erroreren baten ondorioa izan daiteke, bere garaian maparen batean sartu zena eta urtez urte mapa berrietara pasa dena. Koral itsasokoak ez dira trafiko handia duten urak eta halako toki urrunekotako mapetan akatsak aurkitzea uste baina ohikoagoa izan daiteke. Duela 30000 urte gizakiak egin zituen lehen mapetatik egundaino Lurraren argazki perfektuaren bila ibili gara. Bada oraindik ere zer zuzendu argazki horretan.

Leave a comment