-
Home
-
Biodibertsitatea
-
Habitatak
-
Kostaldea
- Padurak
Padurak kostaldeko eremu gazi-geza eta zingiratsuak dira, ibaien bokaletan eratzen diren eta itsas mareen eraginpean dauden hezeguneak. Ibai-itsaso trantsizio hau dela eta, padurak ekosistema konplexuak dira, dinamikoak, aldakorrak eta biodibertsitate handikoak.
Geografiari dagokionean, padurak eremu lauak dira, itsasoaren, ibaien eta ingurune lehorraren arteko trantsizio-habitatak. Gehienetan itsasadarrei loturik egoten direnez, lurzoru areatsuak edo buztintsuak izaten dituzte eta maiz gainera, estuario eta deltekin batera agertzen dira.
Organismo ugariren bizileku dira padurak. Hezegune hauetan landare belarkara semi-urtarrak nagusitzen dira. Izan ere, ibaiek garraiatutako buztinen eta hondarraren nahasketak maiz zohikaztegiak eratzen ditu, oso lur emankorrak direnak. Hala ere, gatz kontzentrazio aldaketa bortitzak eta egunean marea igoera bi pairatu behar izan dituzte bertako landareek eta beraz, aurkitzen ditugun espezie belarkarak urriak dira eta aldaketa hauei moldatuta egoten dira.
Dena den, komunitaterik berezkoenak, gatz-eduki altuak dituzten lurretan garatutakoak dira, eta aniztasun handia azaltzen dute. Lokatzetan landare mamitsuak dira nagusi eta, haien artean, Salicornia ramosissima populazioak azpimarra daitezke. Aldiz, eremu lehorretan urteroko landare galkorren taldeak agertzen dira, Hymenolobus procumbens, Spergularia diandra edo Frankenia pulverulenta bezalakoak. Lurrik hezeenetan, zelaiak garatzen dira eta, bertan, Puccinellia fasciculata edo ihidi halofiloak, Juncus maritimus. Uraren eraginetik libre dauden muino txikietan, Suaeda veraren sastrakadi halofiloak agertzen dira. Azkenik, ertz lehorretan, estepa gazietako komunitate bereziak agertzen dira, Limonium catalaunicum edo Salsola vermiculata azpimarratzekoak.
Materia organiko kontzentrazioa eta argitasuna handia direnez, organismo mikroskopiko ugari aurkitzen dira bertan, elika-katearen oinarri direnak. Ornogabe (mulusko, krustazeo…) eta ornodun ugari bizi dira paduretan baina bereziki hegazti espezie dibertsitate handia izateagatik dira ezagunak.
Euskal Herriko kostaldean zehar padura ugari aurki daitezke baina bereziki aipatzekoak dira Urdaibai eta Txingudiko padurak.
